DGEMs

Maluk sira mak Kristu hadomi,

“Podér Maromak nian ” – Discípulu sira: Discípulu na'in-72 sira ho fuan haksolok relata ba Jesus dehan: “Espíritu aat sira hakruuk ba ami bainhira ami uza Ita-nia Naran.” Jesus responde: “Ha'u haraik ona ba imi podér atu manán inimigu sira; no laiha buat ida ne’ebé bele halo aat imi.” Reflete; “Bainhira ita serbí Maromak nia Vontade no nia Reinu, Nia sei haraik mai ita forsa divina no matenek atu ita habot Maromak nia glória. Ita sente ona esperiénsia hanesan ne’e?”

17Sira hitu nulu resin rua ne’e fila fali hodi haksolok dehan: “Na’i, diabu sira mos tuir ami hodi Ita nia naran.” 18Nia hatan ba sira: “Ha’u foin hare Satanas monu housi lalehan hanesan rai lakan. 19Los duni, Ha’u haraik tiha kbiit ba imi atu sama samea no sakunar sira, hodi manan funubalun nia kbiit tomak; la iha buat ida ne’ebé bele halo aat imi. 20Maski nune’e, keta haksolok tamba espiritu sira tuir imi; haksolok deit tamba imi nia naran hakerek tiha ona iha lalehan.” 21Iha oras neba Nia haksolok teb-tebes ho Espiritu Santu dehan: “Ha’u hahi Ita, Aman, lalehan no rai nia Na’in, basa Ita subar tiha buat sira ne’e housi ema matenek sira hodi fo hatene fali ba sira ne’ebé kiik. Tebes, Aman, Ita hakarak duni nune’e. 22Ha’u nia Aman saran tiha buat hotu mai Ha’u. Ema ida la hatene se mak Oan, Aman deit mak hatene; no ema ida la hatene se mak Aman, Oan deit mak hatene, no ida ne’ebé Oan Mane hakarak fo hatene ba nia.”