DGEMs

Maluk sira mak Kristu hadomi,

“Maria, Liurai-Feto” – Fiar: Ohin, Igreja selebra “Maria, Liurai-Feto”; tanba Maria mak Jesus nia Inan; “Liurai hotu-hotu nian”. Bainhira oan-mane ida hetan onra, inan mós tenke hetan onra. Reflete kona-ba, “Relasaun entre inan no oan ne’e profundamente labele haketak, no liu liu, Nune'e mos Maria no JesusNinia Hakarak nu'udar objetivu importante liu atu moris iha ita-nia fiar loron loron?"

Anju Gabriel fo hatene ba Maria katak Jesus atu moris

26Iha fulan neen, Maromak haruka anju Gabriel ba knua ida Galileia nian, naran Nazare, 27ba fetoran ida nebe hakotu tiha ona ba mane ida naran Jose, housi David nia umakain; fetoran ne’e naran Maria. 28Tama tiha iha uma, anju dehan: “Rahun diak, feto kmanek wa’in tebes! Na’i ho ita!” 29Rona tiha lia ne’e, nia laran taridu hodi husu ba nia an rasik kumprimentu ne’e katak sa los. 30Anju dehan ba nia: “Keta tauk, Maria; basa o hetan rahun diak tebes iha Maromak futar oin. 31O sei ko’us no tur ahi oan mane ida. O sei hanaran Nia Jesus. 32Nia sei sai ema boot; ema sei hanaran Nia Na’i aas liu hotu nia Oan. Na’i Maromak sei haraik ba Nia nia aman David nia kadunan. 33Nia sei ukun Jacob nia umakain ba nafatin; nia ukun sei rohan laek.” 34Maria husu ba anju: “Ne’e sei sai oin sa los, basa ha’u la hola mane?” 35Anju hatan ba nia dehan: “Espiritu Santu sei tun ba o no Na’i aas liu hotu nia kbiit sei hamahan o. Tan ne’e santu nebe atu moris sei hanaran An ‘Maromak nia Oan.’ 36O nia feto maluk Isabel mos ko’us tiha oan mane ida, maski ferik ona. 37Ida nebe ema dehan la ko’us, nia ko’us fulan neen ona; basa, ba Maromak, la iha buat ida nebe la bele.” 38Maria dehan: “Ne’e sa, Na’i nia atan oan mak ne’e. Halo tuir ita liafuan ba!” Hafoin anju husik nia.