DGEMs

Maluk sira mak Kristu hadomi,

“Fiar metin iha Jesus” – Fiar: Jesus la’o iha tasi leten; iha anin-boot nia leet, konvida Pedro atu “hasouru” Nia. Pedro, tun kedas hosi ró, enkuantu apóstolu sira seluk, hela iha seguransa falsu iha ró laran. Reflete kona-ba, "Ita fiar Jesus tomak hanesan Pedro, ka ita kaer metin ba seguransa falsu sira ita-nia moris nian hanesan osan, glória ba an rasik?"

22Tuir mai Jesus haruka eskolante sira sa’e ro hodi ba uluk tasi sorin ba; Nia fali haruka ema lubun fila ba uma. 23Haruka tiha sira ba uma, Nia sa’e ba foho atu harohan mesa-mesak. To’o kalan, Nia mesak deit iha neba. 24Ro fali kilometro ruma ona iha tasi klaran, laloran baku maka’as, basa anin hu’u hasouru. 25To’o kalan fahe ba haat, Nia hakbesik ba sira hodi la’o iha tasi leten. 26Hare tiha Nia la’o iha tasi leten, eskolante sira tauk hodi dehan: “Rai na’in ida!” Sira hakilar ho tauk. 27Jesus koalia kedas ba sira dehan: “Hakmatek ba! Ha’u mak ne’e: keta tauk!” 28Ne’e duni Pedro hatan dehan: “Na’i, Ita Boot mak neba karik, haruka ha’u ba to’o Ita Boot housi laloran leten.” Ne’e duni, Jesus simu: “Mai!” 29Pedro tun housi ro hodi la’o iha laloran leten atu ba to’o Jesus. 30Maibe, hare anin hu’u maka’as, nia tauk hodi hahu mout. Nia hakilar. “Na’i, soi ha’u!” 31Jesus lolo liman kedas ba nia hodi kaer nia dehan: “Ema fiar kiik, tansa o laran namlele?” 32Sira tama tiha ba ro laran, anin kmaus tiha. 33Sira nebe iha ro laran monu iha Jesus nia oin hodi dehan: “Tebes duni, Ita Boot Maromak nia Oan Mane.” 34Hakur tiha tasi, sira tun ba rai Genesare. 35Hatene tiha Nia, ema sira rai neba nian ba fo hatene ba maluk sira iha fatin hotu. Sira lori ba Nia moras sira hotu, 36hodi husu ba Nia atu husik netik sira kona nia tais ninin. No sira nebe kona, hetan isin diak.