DGEMs

Maluk sira mak Kristu Hadomi,

“Hanorin husi Maromak” - Fiar: Jesus haklaken, “Maromak sei hanorin sira hotu; ema hotu ne’ebé rona no aprende husi Aman Maromak; sira hakbesik mai Ha’u.” Reflete: Maromak ninia Espírito Santo ‘hanorin’ ita atu tetu no moris-tuir Ninia hakaran. No, atu dezenvolve relasaun pessoal ho Jesus. Harohan hodi husu Maromak ninia sabedoria atu esperiensia Ninia Domin, Damen, no Ksolok.”

Jesus dehan ba Ninia eskolante sira, “Ema ida labele hakbesik Ha’u wainhira Ha’u Aman ne’ebé haruka Ha’u mai la dada nia; no Ha’u sei halo ema ne’e moris hi’as iha loron ikus. Hakerek nanis ona iha Profeta sira: ‘Maromak sei hanorin sira hotu. Ema hotu ne’ebé rona housi Aman hodi aprende housi Nia, ema ne’e hakbesik Ha’u. Ema ida seidauk hare Aman. Ida ne’ebé mai housi Maromak, Nia de’it mak hare ona Aman. 

Tebes, tebes, Ha’u dehan ba imi: ema ne’ebé fiar hetan moris rohan laek. Ha’u mak pão moris nian. Imi nia beiala sira han mana iha rai fuik maran, no sira mate ona. Ne’e mak pão ne’ebé tun housi lalehan, atu ema ne’ebé han pão ne’e sei la mate. 

Ha’u mak pão moris nian ne’ebé tun mai housi lalehan. Ema ne’ebé han pão ne’e, nia sei moris ba nafatin; no pão ne’ebé Ha’u sei fó mak Ha’u nia isin rasik, saran ba mundu nia moris.”