DGEMs

Maluk sira mak Kristu hadomi,

“Ema Justu no ema sala na’in” – Fiar: iha Evangelho ohin, Jesus dehan “Ha’u mai la’os atu bolu sira ne’ebé mak los no santu maibé ema sala na’in sira”. Reflete; Inan sira mós sei tau matan liu ba oan ne’ebé moras do que nia oan ne’ebé mak isin diak hela. Tamba ne’e, Jesus nia domin mizerikordiozu ba ema hotu, liu-liu ba sala na’in sira. Ita atento ka la’e hodi rona Jesus ne’ebé buka ita ho nia domin mizerikordiozu?

13Jesus sai fali ba tasi ibun. Ema barak ba hasouru nia. Nia hanorin sira. 14Tuir dalan, Nia hare Levi, Alfeu nia oan, tur iha nia fatin hodi kobra osan. Jesus dehan ba nia, “Mai, tuir Ha’u.” Nia hamriik hodi tuir Jesus. 15Wainhira Jesus han iha nia uma, publikanu balun no ema maksalak sira tur hamutuk ho Jesus ho nia eskolante sira, basa barak housi sira le’et tuir Nia. 16Eskriba sira housi fariseu sira nia sorin hare katak Nia han hamutuk ho ema maksalak ho publikanu sira. Sira dehan ba Nia eskolante sira, “Tansa Nia han hamutuk ho publikanu no ema maksalak sira?” 17Jesus, rona hotu ne'e, hatan ba sira, “La'os ema isin diak mak presisa doutor, maibé sira ne’ebé moras. Ha’u la mai  atu bolu ema diak, maibé ema maksalak sira.”