DGEMs

Maluk sira mak Kristu hadomi,

“Jesus nia Laran Sadia Domin nian”: Iha Evangelho ohin nian, “Jesus hanoin tebes ema-lubun ne’e, tanba sira kolen no laran-kraik; hanesan bibi sira ne’ebé la iha bibi-atan.” Reflete;“Jesus iha Kompaisaun Mizerikórdia kle’an ba ema-lubun ne’e no ba ita loron-loron. Iha Ninia Mizerikórdia, Nia oferese ba ita Salvasaun Eterna; no iha Ninia Kompaisaun, Nia lakohi ita atu terus saugati de’it ba buat la folin. Harohan ho fuan agradesidu ne’ebé kle’an ba Jesus loron-loron iha ita nia moris.”

35Jesus la’o lemo sidade ho knua sira hodi hanorin iha sinagoga sira no haklaken liafoun diak reinu nian; fo mos isin diak ba ema moras sira no ba sira hotu nebé terus. 36Haré tiha ema lubun boot, Nia hanoin teb-tebes sira basa sira kole no neon nakraik, hanesan bibi sira nebé bibiatan la iha. 37Tan ne’e Nia dehan ba eskolante sira: “To’os boot duni, Maibé serbisu na’in uitoan. 38Ne’e duni imi harohan ba to’os na’in atu haruka serbisu na’in sira ba nia to’os.”

1Nia bolu nia eskolante sira na’in sanulu resin rua hodi fo kbi’it ba sira atu duni sai espiritu foer sira, no mos atu fo isin diak ba sira hotu nebé terus moras oi-oin. 2Apostolu sira nia naran mak ne’e: ida uluk, Simao nebé ema hanaran Pedro, ho nia alin Andre; Tiago, Zebedeu nia oan, ho nia alin Joao; 3Filipe ho Bartolomeu, Tome ho Mateus publikanu, Tiago, Alfeu nia oan, ho Tadeu, 4Simao Kananeu ho Judas Iscariotes, nebé sei saran Nia.

5Jesus haruka ema na’in sanulu resin rua ne’e la’o ba hodi hanorin uluk sira dehan: “Keta tuir gentiu sira nia dalan, keta tama iha Samaritanu sira nia sidade, 6Maibé buka uluk bibi sira nebé lakon housi umakain Israel nian. 7Tuir dalan, haklaken ba katak reinu lalehan besik ona. 8Halo moras sira hetan isin diak ba, halo mate sira moris hi’as fali ba, halo moras lepra sira sai mos, duni sai diabu sira. Imi simu hodi la selu, fo mos hodi la hein ema selu imi.