DGEMs

Maluk sarani sira mak Kristu hadomi,

"Ipokrizia iha Fiar": Iha Evangelho ohin nian, Jesus fó-sala ba eskriba sira no farizeu sira tanba sira nia fiar ne'ebé hipokrita. Reflete: “Atu iha fiar ne’ebé fraku mak atu hasoru realidade, katak ita presiza haraik-an atu husu ba Maromak atu hametin ita-nia relasaun ho Nia. Maibé, ipokrizia iha ita-nia fiar mak atu lohi ema seluk deliberadamente, hodi Reflete katak ita ‘santu’; bainhira ita la’e.”

13“Susar boot ba imi, eskriba no fariseu sira, laran makerek, basa imi taka reinu lalehan nian ba ema sira; imi la tama, no mos la husik ema seluk ne’ebé hakarak atu tama. 14Susar boot ba imi, eskriba no fariseu sira, laran makerek. Imi han mohu feto faluk sira nia uma hodi lohi sira ho imi nia orasaun nar-naruk; tan ne’e iha loron justisa nian, imi sei hetan kastigu todan liu. 15Susar boot ba imi eskriba no fariseu sira, laran makerek. Imi hakur tasi la’o lemo rai hodi dada ema hotu tuir imi nia fiar no wainhira ida monu iha imi nia liman, imi halo nia sai infernu nia oan dala rua aat liu fali imi. 16Susar boot ba imi, matadalan sira ne’ebé matan delek! Imi dehan: ‘Ema jura karik hodi templu, ne’e la folin buat ida; maibe ema jura karik hodi osan mean templu nian, nia ten ke halo tuir.’ 17Beikten no matan delek sira! Ida ne’ebé mak folin liu: osan mean, ka templu ne’ebé halo santu osan mean? 22Ema ne’ebé jura hodi lalehan, jura hodi Maromak nia tur fatin no mos hodi Ida ne’ebé tur iha nia. 23Susar ba imi, eskriba no fariseu sira, laran makerek! Imi selu du’ut morin sira nia impostu hodi tau ba kotuk buat hirak ne’ebé boot liu iha ukunfuan: justisa, laran luak no fiar metin. Tuir lolos, imi sei halo tuir buat hirak ne’e hodi la hewai buat seluk. 24Imi matadalan matan delek sira ba ema matan delek sira. Imi tais susuk maibe tolan kuda kamelu!