DGEMs

Maluk sira mak Kristu hadomi,

“Bibi-atan di’ak” - Fiar: Iha Evangelho ohin, Jesus haklaken katak Ninia domin mai ita mak pessoal. Nia hatene kada ita ho ita-nia naran, no ita rekonese Ninia lian; no la tuir ema leet de’it. Reflete: “Oinsa no wainhira ita esperiensia Jesus pessoalmente? Ita kolia no rona Jesus lorloron no la’os de’it wainhira ita hasoru aflisaun no adversidade?”

Jesus hateten nune’e, “Tebes, tebes, Ha’u dehan ba imi: ida ne’ebé la tama ba bibi luhan housi odamatan maibé tama housi fatin seluk, ema ne’e na’okten ida no buka de’it atu han. Maibé ida ne’ebé tama housi odamatan, nia mak bibi atan. Ida ne’ebé hein odamatan loke ba nia; bibi sira rona nia lia, nia bolu bibi sira hodi sira nia naran, no lori sira ba liur. Hasai tiha nia bibi sira hotu, nia la’o uluk; bibi sira tuir nia, tan sira hatene nia lia. Maibé bibi la tuir ema leet ida; sira halai housi nia, tan sira la hatene ema ne’e nia lia.”  

Ha’u mak odamatan. Ida ne’ebé liu housi Ha’u sei hetan maksoin; nia sei tama no sai hodi hetan du’ut matak.Na’okten mai atu na’ok, atu oho, atu harahun de’it. Ha’u mai atu ema hetan moris, hodi hetan moris ne’e wa’in liu tan.