DGEMs

 Maluk sira mak Kristu hadomi,

“Liafuan Di’ak Salvasaun” - Fiar: Iha Evangelho ohin, Jesus oferece Grasa SalvasaunRohan La’ek ne’ebé furak liu ba ema hotu-hotu fiar iha Nia no moris-tuir Ninia LiafuanDi’ak. Reflete: “Ita moris tuir Kristu ninia Roman no Lialos, ho sinceridade no kompromisu? Ita moris iha unidade, damen no Ksolok iha Jesus ka ita lakohi husi ita-nia moris sentraliza ba an no moris iha salan?”

Jesus dehan ba Nicodemos: tan Maromak hadomi tebes mundu to’o fo Nia Oan Mane mesak, atu ema hotu ne’ebé fiar iha Nia la bele lakon, maibé hetan moris rohan la’ek. Basa, Maromak la haruka nia Oan Mane mai iha mundu atu tesi lia ba mundu, maibé atu mundu hetan maksoin hodi Nia. Sei la tesi lia ba ema ne’ebé fiar iha Nia, maibé ema ne’ebé la fiar ema tesi lia ona, basa la fiar iha Maromak nia Oan Mane mesak nia naran. Sira hetan kastigu nune’e: roman mai iha mundu, maibé ema sira hadomi nakukun liu fali roman, basa sira nia hahalok aat. Basa ema hotu ne’ebé halo aat hakribi roman, no nia la hakbesik ba roman atu ema labele si’ak nia hahalok sira. Maibé ema sira ne’ebé moris tuir lialos hakbesik ba roman atu nia hahalok hotu mosu mo-mos nu’udar halo iha Maromak.”