DGEMs

Maluk sira mak Kristu hadomi,

“Emosaun - Matan Delek iha Fiar”: Iha Evangelho ohin, eskolante nain rua la’o ba knua Emaus. Sira triste tanba Jesus ninia Terus no Mate, no la rekonese Nia nu’udar Na’i Moris Hias. Reflete: “Ita-nia emosaun bele belit-metin iha ita: wainhira ita iha kanek, depresaun, nsst. Ita bele lakon ita-nia sensibilidade ba valores fiar no vokasaun nian.

Iha loron neba eskolante na’in rua la’o ba knua ida naran Emaus, besik kilometru ualu housi Jerusalem. Sira koalia ba malu kona-ba buat ne’ebé mosu. Sira sei koalia hodi haksesuk malu dau-daun, Jesus rasik hakbesik hodi la’o hamutuk ho sira. Maibé sira nia matan la dauk nakloke atu hatene Nia. Nia dehan ba sira: “Imi koalia ba malu kona-ba sa ida tuir dalan?” Sira para tiha ho oin nakraik. Nia husu ba sira: “Sa ida?” Sira hatan: “Kona-ba Jesus Nazare, profeta ida beran boot iha lia no hahalok iha Maromak no povu tomak nia oin: oin sa ita nia amlulik boot no na’i ulun sira saran Nia ba mate hodi hedi Nia ba krus. Los duni, ami nia feto maluk balun halo ami hakfodak, basa dadersan hela, sira ba rate; hafoin, la hetan Nia isin, sira mai haktuir katak sira hare anju sira ne’ebé dehan katak Nia moris.

Nia dehan ba sira: “Imi ema beik duni, no neon badak atu fiar buat hotu nebe profeta sira hateten! Mesias sei la terus buat hirak ne’e atu nune’e Nia bele tama iha Nia gloria?” Hafoin, hahú housi Moises no profeta sira hotu, Nia hatudu ba sira buat hotu ne’ebÁ hakerek tiha kona ba Nia. 

Hafoin, tur tiha atu han ho sira, Nia kaer paun, fó bensa, silu hodi fahe ba sira. Sira nia matan nakloke hodi hatene Jesus; maibé Nia lakon kedas housi sira oin.