DGEMs

 Maluk sira mak Kristu hadomi,

“Jesus Ninia Paixaun” - Fiar: Iha Liturjia Paixaun nian remata iha Jesus ninia mate. Maibé, Terus sira ne’e mos nu’udar Jesus ninia manan salan no mate. Reflete: “Jesus simu konsekuensia todan ne’e ba ita-nia salvasaun. Ita agradese ba Jesus ba Ninia perdaun mizerikordiozu ba ita-nia salan sira? Kolia ba Nia pessoalmente...iha ita-nia orasaun.”

Jesus ho nia eskolante sira hakat liu ba mota Sedrom. Sira tama iha to’os ida iha neba.  Tuir mai, Pilatos haruka ema lori Jesus hodi baku Nia. Pilatos sai fali hodi dehan ba sira: “Haré ba. Ha’u hatudu Nia ba imi atu imi hatene katak Ha’u la hetan sala ida iha Nia.” Nune’e Jesus sai mai iha liur, ho koroa ai tarak nian no unuk mean. Pilatos dehan: “Ema mak ne’e!” Haré tiha Nia, amlulik boot no guarda sira hakilar dehan: “Hedi Nia ba krus! Hedi Nia ba krus!” 

Pilatos dehan ba sira: “Imi rasik lori Nia ba hodi hedi Nia ba krus; tan ha’u la hetan sala ida iha Nia.” Ne’e duni, Pilatos saran Jesus ba sira atu sira hedi Nia ba krus. Tuir mai Judeu sira lori Jesus no Nia sai ba liur hodi Nia lori nia krus iha nia kbaas ba fatin ida naran “ulun ruin fatin,” ne’ebé dehan iha lia Ebreu “Golgota.” Iha neba sira hedi Nia iha krus hamutuk ho ema na’in rua, ida iha sorin ida-ida, no Jesus iha klaran. Pilatos haruka hakerek ai kabelak ida atu tara iha krus. Hakerek nune’e: “Jesus Nazare, Judeu sira nia liurai.”  

Nia inan, nia inan nia alin, katak Maria, Cleofas nia fen, ho tan Maria Madalena hamriik besik Jesus nia krus. Tuir mai, tan hatene ona katak buat hotu la’o tuir ona, atu halo tuir lolos escritura, Jesus dehan: “Ha’u hamrook!” Iha neba iha buli oan ida ho tua sin, tan ne’e, sira habokon esponia ida iha tua sin ne’e, tau iha fafulu tutun hodi lolo ba Jesus nia ibun. Koko tiha tua sin ne’e, Jesus dehan: “Buat hotu tuir los ona,” hafoin, Nia halis Nia ulun hodi saran nia klamar.