DGEMs

 Maluk sira mak Kristu hadomi,

“Domingo Paixaun” - Fiar: Iha Evangelho ohin, Pilatos deklara Jesus inosente, maibé nia intrega Jesus atu simu pena morte, husi ema lubun boot. Reflete: “Ita responsabiliza ba desizaun sira hotu iha ita-nia moris. Ita labele justifika no kondena ema seluk ba ita-nia salan sira. La’os mós atu aproveita de’it Maromak ninia laran luak rohan la’ek.”

Katuas sira povu nian, amlulik boot no eskriba sira hamriik hodi lori Nia ba Pilatos. Pilatos husu, “O Judeu sira nia liurai?” Nia hatan ba nia, “O mak dehan.” Pilatos dehan fali ba amlulik boot sira no ba ema lubun boot: “Ha’u la hetan sala ida iha ema ne’e.” Herodes mos la hetan buat ida; tan ne’e, nia haruka fali mai ha’u. Ema ne’e la halo buat ida ne’ebé soi mate. Ne’e duni, ha’u sei kastigu Nia hodi husik Nia ba.”

Maibé sira hotu hakilar hamutuk dehan: “Oho tiha nia! Hasai mak Barrabas!”  Dala ida tan Pilatos koalia ba sira hodi buka soi Jesus. Maibé sira hakilar nafatin: “Hedi Nia ba krus! Hedi Nia ba krus!” Ba dala tolu nia dehan ba sira: “Nia halo aat sa?  Ha’u la hetan sala ida ne’ebé soi mate. Ne’e duni, ha’u sei kastigu Nia, hafoin husik Nia ba.” Maibé sira litik hodi husu ho lia maka’as atu hedi Nia ba krus. Sira nia lia maka’as liu tan ba dau-daun. 

Pilatos hasai ema ne’ebé dadur tan soran povu no oho ema, no saran Jesus ba sira tuir sira nia hakarak. Wainhira sira lori Nia, sira kaer ema ida housi Sirene naran Simão, ne’ebé fila dau-daun housi to’os, hodi tau krus iha nia kbaas atu lori tuir Jesus. Ema lubun boot tuir Nia, no mos feto sira ne’ebé baku sira nia hirus matan no tanis hanoin tebes Nia. Maibé Jesus fila oin ba sira dehan: “Jerusalem nia oan feto sira, keta tanis tamba Ha’u; maibé tanis tan imi an rasik no tan imi nia oan sira. 

Wainhira sira to’o fatin naran Kalvariu, sira hedi Nia ba krus ho ema aat sira ne’e, ida iha sorin kuana, ida seluk iha sorin karuk. Jesus dehan: “Aman, perdua sira, basa sira la hatene buat ne’ebé sira halo.” Tuir mai sira dada  sorte atu fahe ba malu Jesus nia unuk sira. Iha nia ulun leten ema hakerek: “Ne’e mak Judeu sira nia liurai.” Besik ona loron fahe rua, nakukun taka rai tomak to’o tuku tolu loraik, loromatan lakon nia naroman. Hena templu nian nakles fahe ba rua iha klaran, no Jesus hakilar ho lia maka’as: “Aman, iha Ita liman Ha’u saran Ha’u nia klamar!” Dehan tiha ne’e, Nia iis kotu.