DGEMs

Maluk sira mak Kristu hadomi,

“Gratidaun – Kompaisaun” – Fé: Iha Evangelho ohin, mane riku ida halo festa sem iha kompaisaun ruma hodi tau matan ba Lazarus; ema ne’ebé husu osan iha nia odamatan. Wainhira sira rua mate, mane riku ne’e selu presu ba nia kanten sira, hodi sofre la hotu. Lazarus, fali haré nia-an iha Paraiso. Reflete; “Ita iha gratidaun ne’ebé profundo iha Na’i ba Nia bensaun boot sira ne’ebé Nia fó mai ita ne’e? No ita fahe ka partilha bensaun sira me’e domin ne’ebé kompasivu?

“Ema riku ida hatais mesak mean furak ho kabas lahan lotuk. Loron loron nia halo festa boot. Ema kiak ida naran Lazaro tur hela iha nia odamatan. Kiak ne’e hakarak hili etu mumun housi riku nia meja okos; asu sira mai belo nia kanek sira. 

Loron ida ema kiak ne’e mate, Maromak nia anju sira lori nia ba hamutuk ho Abraao. Ema riku ne’e mos mate, ema hakoi nia. Terus barak iha infernu, ema riku ne’e foti matan hodi haré housi dook Abraao ho Lazaro hamutuk ho nia. Iha oras ne’e nia hasa’e lia maka’as dehan: ‘Ha’u aman Abraao, sadia atan ha’u! Haruka netik Lazaro atu habokon nia limanfuan rohan iha be laran, hodi mai halo malirin ha’u nia nanal, basa ha’u terus la diak iha ahi ne’e!’ 

Abraao hatan: ‘Oan, hanoin ba katak o simu ona o nia diak iha o nia moris tomak; Lazaro fali simu mak susar de’it. Oras ne’e Lazaro hetan ksolok; o fali hetan terus boot. Hafoin, housi ami ba imi mos rai kuak boot haketak ita: nune’e ami ida hakarak karik liu ba imi, la bele; imi ida hakarak hakat karik mai ami, mos la bele.’