DGEMs

Maluk sira mak Kristu hadomi,

“Fiar ne’ebé genuino”: Iha Evangelho ohin, ema lubun boot husu ba Jesus atu prova katak Nia mak Mesias. Como sira nia pedidu ne’e mesak falso no la ho fiar ne’ebé genuino, Jesus haksiak sira. Reflete; “ita bele de’it bosok ema seluk liu husi insinceridade, maibé Na’i haré no hatene intensaun real husi ita nia fuan. Harohan ba grasa sira Na’i nian atu purifika ita nia intensaun sira.”

Wainhira ema lubun boot halibur tiha an, Nia dehan: “Otas ne’e otas aat duni; ema sira husu sinal ida, maibé sinal mesak ne’ebé sei fó ba sira mak sinal Jonas nian. Basa, hanesan Jonas sai sinal ida ba ema rai Ninive nian, nune’e mos Oan Mane sei sai sinal ida ba ema sira housi otas ne’e. 

            Iha loron tesi lia nian, liurai feto tasimane nian sei hamriik hasouru ema sira ne’e hodi tesi lia todan ba sira; basa nia mai housi mundu nia rohan atu rona Salomao nia matenek, no iha ne’e iha Ida ne’ebé boot liu fali Salomao. 

            Iha loron tesi lia nian, Ninive nia oan sira sei hamriik hasouru ema sira ne’e, hodi tesi lia todan ba sira; basa wainhira Jonas haklaken Maromak nia liafuan, sira hakribi sira nia sala, maibé iha ne’e iha Ida ne’ebé boot liu fali Jonas.”