DGEMs

Maluk sira mak Kristu hadomi,

“Mesias nia moris” – Fiar: Evangelho ohin nian revela Jesus Mesias, hodi kumpre profesia sira, katak Nia moris iha sidade ida iha Belém; toba iha balada han-fatin. Reflete; "Mesias nia haraik-an, konvida ita atu deskobre Nia ho moos liu tán, ho kle’an no pesoál liu husi moris ida haraik-an nian, la’os ho pose no orgullu mundu sekulár nian."

Jesus nia moris

1Iha loron hirak neba Cesar Agosto fo sai ukunfuan ida, hodi haruka ema iha mundu tomak atu ba tau naran. 2Ukunfuan ne’e ema hala’o ba dala uluk wainhira Quirino mak emboot iha rai Siria. 3Ema ida-ida ba tau naran iha nia sidade rasik. 4Tan José mai housi umakain David nian, nia mos husik sidade Nazare iha Galileia, hodi sa’e ba Judeia, ba David nia sidade naran Belem, 5atu tau naran ho nia kaben Maria, nebé isin rua. 6Wainhira sira sei iha neba, Maria nia loron atu tur ahi to’o dau-daun. 7Nia tur ahi nia oan mane boot, hodi haneras no hatoba nia iha balada han fatin, basa la iha fatin oan ida ba sira iha uma laran. 

8Iha fatin neba iha bibi atan balun, nebé kalan kalan hein sira nia bibi iha rai luan. 9Na’i nia anju mosu ba sira. Maromak nia Glória nabilan iha sira le’et. Sira hakfodak teb-tebes. 10Tuir mai anju dehan ba sira: “Imi keta tauk, basa ha’u lori liafoun diak ida ba imi, nebé sei haksolok mos povu tomak: 11ohin iha David nia sidade, foin moris ba imi Maksoin ida, katak Kristu Na’i. 12Sinal ba imi mak ne’e: imi sei hetan kosok oan ida haneras no toba iha balada han fatin.” 13Teki-teki anju lubun boot ida halibur hamutuk ho anju ne’e hodi hahi Maromak dehan: 14“Glória ba Maromak iha leten aas ba, dame iha raiklaran ba ema sira nebé Nia hadomi!”