DGEMs

Maluk sira mak Kristu hadomi,

“Desânimo - Fiar":iha epizôdio Evangelho ohin, Bartimeu, ema matan delek ida nebé iha fiar nebé metin no kle’an, wainhira rona Jesus iha neba, nia hakilar makas hodi husu Jesus atu kura nia moras. Maibé wainhira ema barak dehan ba nia atu nonok, nia hakilar nafatin. Reflete: lembra fali tempu ka oportunidade uluk nebé ita buka hodi halo tuir Maromak nia vontade. Lembra mós dezafiu sira nebé mak mosu iha tempu neba tamba Espíritu aat kontinua domina ita. Ita luta nafatin ka lae hanesan Bartimeu?

46Sira ba to'o Jeriko. Wainhira Nia atu sai ona housi neba ho Nia eskolante sira ho ema lubun boot ida, ema matan delek ida, Bartimeu, Timeo nia oan, tur iha dalan ninin, husu esmola.  47Wainhira nia rona katak Jesus Nazare liu housi neba, nia hahu hakilar hodi dehan: “Jesus, David nia Oan, sadia ha’u!” 48Ema barak si’ak nia hodi haruka nia atu nonok, maibé nia hetok hakilar maka'as liu tan, “David nia Oan, sadia ha’u!” 49Jesus para hodi dehan: “Bolu nia mai.” Sira bolu nia dehan: “Aten berani ba, hamriik ba. Nia bolu o.” 50Nia soe nia lipa, hamriik kedas hodi la'o ba Jesus. 51Jesus lia tun ba nia dehan: “O hakarak Ha’u sei halo sa los ba o?” “Mestre,” ema matan delek ne'e hatan, “Halo Ha’u haré!” 52Jesus lia tun dehan: “Ba, o nia fiar soi o!” Nia haré kedas hodi la'o hamutuk ho Jesus iha dalan.