DGEMs

Maluk sira mak Kristu hadomi,

“Fiar - Responsabilidades": iha Evangelho ohin, Jesus dehan nia Discípulo sira: “Ba ema nebé simu barak, sei husu mos barak; no ema nebé simu knaar boot, barak liu mak ema sei husu ba nia.” Reflete: wainhira ita bele hadomi no serbí Maromak, ida ne’e onra no privilêgiu bot ba ita. No wainhira Maromak abensoa ita nia moris ho buat barak, ita presiza discerne hodi uza bensaun sira ba Maromak nia Glória. Tamba ne’e ita presiza iha prioridade nebé klaru atu bele konsentra iha serbí Maromak iha ita nia moris.

39Imi rona di-diak ba: uma na’in hatene karik tuku hira mak na’okten atu mai, nia sei la husik nia tama iha nia uma. 40Imi hein hela ba, basá iha oras nebé imi la hanoin kona, Oan Mane sei hiit an mai.”

41Pedro dehan ba Nia: “Na’i, Ita haktuir aiknanoik ida ne’e ba ami de’it, ka ba ema hot-hotu mos?” 42Na’i simu: “Se mak atan diak no matenek nebé uma na’in haruka atu haré nia família hodi fahe aihan ba sira tuir oras lo-los? 43Ksolok ba atan nebé nia na’in hetan halo nune’e wainhira nia to’o mai. 44Tebes, Ha’u dehan ba imi katak nia sei fo knaar ba atan ne’e atu haré nia rikusoi tomak. Ba ema nebé simu barak, sei husu mos barak; no ema nebé simu knaar boot, barak liu mak ema sei husu ba nia.”