DGEMs

Maluk sira mak Kristu hadomi,

“Paun Moris” – Fiar: Iha evangelho ohin, Jesus proklama katak, “Ha’u mak Paun moris nian... ne’ebé tun mai husi lalehan, atu nune’e ema ne’ebé sei han nia no sei la mate tan”. Reflete; “Paun Moris ida ne’e katak ita simu iha sakramentu Eukaristia, mak Jesus nia Futar Isin no Ran rasik. Harohan ba grasa sira, atu fó valor kle’an liu tan mistériu divinu ida ne’e, ne’ebé mak fó ba ita moris rohan la’ek.”

Pe. Philip Heng, S.J.

41Ema Judeu sira muramura ba Jesus tamba Nia dehan: “Ha’u mak paun nebe tun mai housi lalehan.” 42Sira hateten: “Nia la’os Jesus, Jose nia Oan? Ita hatene Nia aman no inan. Nusa mak nia bele dehan: ‘Ha’u tun mai housi lalehan?” 43Jesus hatan ba sira dehan: “Keta muramura ba malu. 44Ema ida la bele hakbesik Ha’u wainhira Ha’u Aman nebe haruka Ha’u mai la dada nia; no Ha’u sei halo ema ne’e moris hi’as iha loron ikus. 45 Hakerek nanis ona iha Profeta sira: ‘Maromak sei hanorin sira hotu. Ema hotu nebe rona housi Aman hodi aprende housi Nia, ema ne’e hakbesik Ha’u. 46Ema ida seidauk hare Aman. Ida nebe mai housi Maromak, Nia deit mak hare ona Aman. 47Tebes, tebes, Ha’u dehan ba imi: ema nebe fiar hetan moris rohan laek. 48Ha’u mak paun moris nian. 49Imi nia bei ala sira han mana iha rai fuik maran, no sira mate ona. 50Ne’e mak paun nebe tun housi lalehan, atu ema nebe han paun ne’e sei la mate. 51Ha’u mak paun moris nian nebe tun mai housi lalehan. Ema nebe han paun ne’e, nia sei moris ba nafatin; no paun nebe Ha’u sei fo mak Ha’u nia isin rasik, saran ba mundu nia moris.”