DGEMs

Maluk sira mak Kristu hadomi,

“Tanis iha Jesus nia Rate”-Fiar: Iha Evangelho ohin nian, Maria Madalena tanis iha Jesus nia rate, basá nia hanoin katak ema na’ok tiha ona Jesus nia isin. Kristu ne’ebé moris hias hosi mate, mosu ba Maria Madalena no bolu nia naran, nune’e halo nia rekoñese kedas Jesus. Ida ne’e revela Jesus ho Maria Madalena nia amizade ne’ebé di’ak tebes. Reflete; to’o iha momentu ida ne’e, oinsá ha’u haburas ona ha’u nia relasaun ho Jesus ka la’e?

Pe. Philip Heng, S.J.

Jesus mosu ba Maria Madalena

                11Maria fali hamriik besik rate iha liur hodi tanis. Nia sei tanis hela, nia hakru’uk hodi hateke ba rate laran. 12Nia hare anju na’in rua hatais mutin tur iha fatin nebe sira tau Jesus nia isin, ida iha ulun, ida iha ain. 13Sira dehan: “Feto, tansa o tanis?” Nia hatan ba sira: “Basa ema lori tiha ha’u nia Na’i no ha’u la hatene sira tau Nia iha nebe.” 14Dehan tiha liafuan hirak ne’e, nia fila ba kotuk hodi hare Jesus hamriik iha neba, maibe nia la hatene katak ne’e Jesus. 15Jesus dehan ba nia, “Feto, tansa o tanis? O buka se?” Hanoin katak Nia mak to’os na’in, Maria husu fali: “Na’i, ita lori Nia karik, hateten to’ok mai ha’u ita tau Nia iha nebe atu ha’u bele ba lori Nia.” 16Jesus dehan: “Maria!” Nia fila hodi dehan ba Jesus iha lia ema Ebreu nian: “Rabboni!” katak Mestre. 18Ne’e duni, Maria Madalena ba hateten ba eskolante sira: “Ha’u hare ona Na’i;” no nia hateten ba sira katak Nia dehan buat sira ne’e ba nia.