DGEMs

Maluk sira mak Kristu hadomi,

“Halo diak – Maromak nia hakarak?”: Iha evangelho ohin nian, Jesus haklaken ba nia eskolante sira, diferensa klara entre “halo diak” no “halo tuir Maromak nia hakarak.” Ba ema sira ne’ebé serbí Maromak nia hakarak maka sensivel hodi bele tama ba “Reinu lalehan”. Reflete; “wainhira ita halo tuir ita nia hakarak no la os tuir Na’i Maromak nia hakarak, ita babain halo hanesan ne’e tamba ita prefere atu konsetra buat hotu iha ita nia-an.

Pe. Philip Heng, S.J.

Eskolante diak los

 21“La’os ema hotu ne’ebé dehan mai Ha’u: ‘Na’i, Na’i!’ sei tama iha Reinu lalehan, maibe nia de’it ne’ebé halo tuir Ha’u Aman iha lalehan nia hakarak. 22Ema barak sei dehan mai Ha’u iha loron neba: ‘Na’i, Na’i, la’os hodi Ita Boot nia naran mak ami si’ik nudar profeta, no hodi Ita naran mak duni sai tiha diabu sira, no mos halo milagre barak?’ 23Iha oras neba Ha’u sei hatan mo-mos ba sira: ‘Ha’u la hatene imi; hadook an tiha housi Ha’u,  imi sira ne’ebé halo aat.’”

24“Ne’e duni, ema ne’ebé rona Ha’u nia liafuan hirak ne’e hodi  moris tuir, nia hanesan ema matenek ne’ebé harii nia uma iha fatuk leten; 25udan tau, mota tun, anin hu’u hasouru uma ne’e, maibe uma la monu basa hamriik iha fatuk leten. 26Maibe, ema ne’ebé rona Ha’u nia liafuan hirak ne’e, no la halo tuir nia, nia hanesan ema beikten ne’ebé harii nia uma iha rai henek leten. 27Udan tau, mota tun, anin hu’u hasouru hodi sobu uma ne’e; uma ne’e monu. Nia rahun aat liu.”

28Wainhira Jesus ko’alia hotu tiha, ema lubun hakfodak ho nia doutrina, 29basa Nia hanorin sira hanesan ema ne’ebé iha kbiit, la’os hanesan eskriba no fariseu sira.