DGEMs

Maluk sira mak Kristu hadomi,

“Justisa iha loron ikus”- Fiar: Iha Evangelho ohin nian, Jesus haklaken ba nia eskolante sira kona-bá loron tesi lia, Maromak sei tesi lia ba ema ida-idak oinsá domin, kompaixaun, no kuidadu ne’ebé ita hatudu ona ba ema seluk. Reflete; “se ita hadomi Maromak ho haraik-an, ita sei nakonu ho Jesus nia kompaixaun, domin no laran luak. Caso contrário, fasilmente, ita bele sai orgulhosos no egocêntricos.”

Pe. Philip Heng, S.J.

Justisa iha loron ikus

31“Wainhira Oan Mane mai iha nia glória no nia  anju sira hotu hamutuk ho Nia, Nia sei tur iha nia kadunan glória nian. 32Povu hotu sei halibur an iha nia oin. Nia sei haketak ema sira hanesan bibi atan haketak bibi malae housi bibi Timor. 33Nia sei tau bibi malae iha nia sorin kuana, bibi Timor iha nia sorin karuk. 34Tuir mai, liurai sei dehan ba sira ne’ebé iha nia sorin kuana: ‘Mai, imi ne’ebé Ha’u Aman fo bensa, mai simu nudar liman rohan reinu ne’ebé hadia tiha ba imi houri mundu hahu. 35Basa Ha’u hamlaha, imi fo han Ha’u; Ha’u hamrook, imi fo hemu Ha’u; Ha’u la’o rai, imi simu Ha’u; 36Ha’u isin tanan, imi fo hatais Ha’u; Ha’u moras, imi ba haré Ha’u; Ha’u iha dadur laran, imi ba haré Ha’u.’ 37Iha oras ne’e ema diak sira sei hatan ba Nia: ‘Na’i, wainhira lós mak ami haré Ita Boot hamlaha, ami fó han; hamrook, ami fo hemu? 38Wainhira lós mak ami haré Ita Boot la’o rai, ami simu; eh ho isin tanan, ami fo hatais? 39Wainhira lós mak ami haré Ita moras eh iha dadur laran, ami ba haré Ita?’ 40Liurai sei hatan ba sira: ‘Tebes, Ha’u dehan ba imi: wainhira imi halo buat ne’e ba ha’u nia alin kiik sira ne’e ida, imi halo mai Ha’u rasik.’”