DGEMs

Maluk sira mak Kristu hadomi,

Jesus nia kompaisaun-domin: Iha Evangelho loron ohin nian, kona-bá Jesus nia kompaisaun-domin ba ema rihun lima ne’ebé presiza, Nia proklama kona-bá Liafuan Di'ak salvasaun, kura ema moras sira no mós multiplika paun no ikan atu fó-han sira. Hanoin to'ok kona-bá ne'e: "Ita hetan konvite atu hatoo ba Jesus kona-bá buat hotu ne'ebé ita presiza: ita-nia fiar, ita-nia emosional, família, saúde no buat seluk tan. Nia sei sempre iha ne'ebá ba ita."

Pe. Philip Heng, S.J.

Jesus fo han ba ema barak

13Rona tiha buat ne’e, Jesus sa’e ba ro ida hodi ba mesak iha rai fuik maran; maibe hatene tiha ne’e, ema lubun boot husik sidade sira hodi la’o tuir buka Nia. 14Tun housi ro hodi hare ema barak ne’e, Nia hanoin teb-tebes sira hodi fo isin diak ba sira ne’ebé moras. 15Loraik dau-daun ona, eskolante sira hakbesik ba Nia hodi dehan: “Fatin ne’e rai fuik, no kalan besik ona; haruka ema sira ne’e ba ona, atu sira bele sosa aihan iha knua sira.” 16Nune’e Jesus dehan ba sira: “Sira lalika ba; imi rasik fo han sira ba.” 17Sira hatan ba Nia: “Ami iha deit paun fuan lima no ikan rua.” 18“Lori sira mai,” Nia dehan. 19Hafoin Nia haruka ema lubun boot tur iha du’ut leten. Nia kaer paun fuan lima no ikan rua ne’e, foti matan ba lalehan hodi fo bensa. Tuir mai Nia silu paun sira ne’e hodi fo ba eskolante sira; hafoin sira fahe ba ema lubun boot. 20Sira hotu han to’o bosu; baluk sira ne’ebé resin, sira tau ba luhu sanulu resin rua nakonu! 21Ema sira ne’ebé han hamutuk mane rihun lima, la sura feto no labarik sira.