DGEMs

Maluk sira mak Kristu hadomi,

Fiar iha Jesus: iha Evangelho ohin, Jesus kura no perdua ema moras isin-maten nia salan sira. Maibé ema lubun boot dúvida Jesus Nia kbi’it divina atu perdua salan sira. Reflete; iha evidensia rohan la’ek hatudu katak Maromak mak kriadór. No Nia mós halo ona milagre barak iha ita nia moris. Ita sei dúvida nafatin no la prontu atu fó ita nia-an tomak ba Maromak nu’udar ita nia Maksoin no Na’i?

Pe. Philip Heng, S.J.

Ema moras isin mate hetan diak

                    1Sa’e tiha ro ida, Jesus hakur tasi hodi to’o ba ninia sidade. 2Sira hatudu ba Nia ema isin mate ida, toba hela iha tobafatin ida. Hare tiha sira nia fiar, Jesus dehan ba ema moras ne’e: “Oan, aten berani ba, o nia sala sira hetan ona perdua.” 3Eskriba sira balun dehan iha sira nia laran: “Ema ne’e hateten aat Maromak” 4Hatene tiha sira nia hanoin, Jesus dehan ba sira: “Tansa imi hanoin aat iha imi nia laran? 5Ida nebe mak lalais liu atu dehan: ‘O nia sala sira hetan tiha perdua,’ ka dehan ‘O hamriik, la’o ba’? 6Diak, atu imi hatene katak iha rai ne’e Oan Mane iha kbiit atu kasu sala,” Nia dehan ba ema isin mate: “Hamriik ba, foti o nia hadak, la’o ba o nia uma.” 7Nia hamriik hodi la’o ba nia uma. 8Hare tiha ne’e, ema lubun tauk tebtebes hodi hasa’e gloria ba Maromak nebe fo kbiit ida hanesan ne’e ba ema sira.