DGEMs

Maluk sira mak Kristu hadomi,

“Maromak Simu ita nia Orasaun sira”: Iha evangelho ohin, Jesus promete Ninia eskolante sira, “Buat naran de’it imi husu hodi Ha’u nia naran, Ha’u sei halo atu fo glória ba Aman.” Reflete: “Se ita hakarak atu hadomi no serví Maromak no Ninia emar sira, Jesus garantia katak ita nia orasaun sira sei sai realidade . . . Tan ne’e, ita nia domin ba Maromak kle’an no honestu ka la’e?”

Pe. Philip Heng, S.J.

Jesus dehan ba eskolante sira, ‘Imi hatene ona Ha’u karik, imi hatene ona mós Ha’u Aman. Houri ohin ba oin, imi hatene ona Nia no hare ona Nia.” Filipe husu ba Nia: “Na’i, hatudu Aman mai ami; ne’e to’o ona mai ami.’ Jesus dehan ba nia: “Ha’u hela kleur ona ho imi, Filipe, no imi seidauk hatene Ha’u? Ema ne’ebé hare ona Ha’u, hare ona mós Ha’u Aman. Nusa mak o dehan: ‘Hatudu Aman mai ami?' O la fiar katak Ha’u hela iha Aman no Aman hela iha Ha’u? Liafuan hirak ne’ebé Ha’u dehan ba imi, Ha’u la dehan hodi Ha’u an rasik. Ha’u Aman ne’ebé hela iha Ha’u mak halo Nia hahalok. Fiar Ha’u katak Ha’u hela iha Aman, no Aman hela iha Ha’u. Lae karik, fiar tamba hahalok hirak ne’e. Tebes, tebes, Ha’u dehan ba imi: ema ne’ebé fiar iha Ha’u sei halo mós hahalok sira ne’ebé Ha’u halo; nia sei halo hahalok boot liu fali hirak ne’e, tan Ha’u atu la’o ba Aman. 

Buat naran deit ne’ebé imi husu hodi Ha’u nia naran, Ha’u sei halo, atu Aman hetan glória iha Oan Mane; imi husu karik buat ida hodi Ha’u nia naran, Ha’u sei halo.”