DGEMs

Maluk sira mak Kristu hadomi,

“Fase Ain” – Han-Kalan Ikus: Iha evangelho ohin, Jesus fase apostolu sanulu resin ruaninia ain durante han-kalan ikus. Nune’e, aktu ne’e fó hanoin sira atu serbí Maromak ninia Liafuan Di’ak, ho haraik-an hanesan Na’i. Reflete: “Ita haraik-an no generozu iha ita nia moris lorloron no kna’ar? Se ita nia foti-an no loko-an impede ita atu sai hanesan Jesus?”

Pe. Philip Heng, S.J.

Jesus fase eskolante sira nia ain

4Jesus hamriik housi meja, kolu nia unuk no hola hena mutin naruk ida hodi kesi ba nia knotak. 5Tuir mai, Nia tau be iha basia ida no hahu fase apostolu sira nia ain hodi hamaran sira ho hena mutin nebe bobar hela iha nia knotak. 6Nia to’o ba Simao Pedro nebe dehan: “Na’i, Ita atu fase atan Ha’u nia ain?” 7Jesus hatan ba nia: “Oras ne’e o la bele hatene buat nebe Ha’u halo dau-daun; ikus mai o sei hatene.” 8Pedro simu: “Lae, ba nafatin Ita sei la fase ha’u nia ain!” Jesus dehan fali ba nia: “Ha’u la fase o nia ain karik, o sei la iha parte ho Ha’u.” 9Simao Pedro hasa’e fali lia ba Jesus dehan: “Ne’e sa, Na’i, fase la’os ha’u ain deit; fase mos ha’u liman no ulun.”

12Fase hotu tiha sira nia ain, no hola fali nia unuk, Nia fila ba nia fatin hodi dehan ba sira: “Imi komprende Ha’u halo sa los ba imi? 13Imi bolu Ha’u Mestre no Na’i; imi dehan los: Ha’u nune’e duni. 14Ne’e duni, Ha’u, Na’i no Mestre, fase karik imi nia ain,  imi mos sei fase nia ain ba malu. 15Basa Ha’u fo esemplu ba imi, atu, nudar Ha’u foin halo ba imi, imi mos banati tuir.