DGEMs

Maluk sira mak Kristu hadomi,

Resureisaun Jesus nian: Iha Evangelho loron ohin, feto balun nebé hadomi tebes Jesus ba nia rate ho mina morin no hetan Jesus nia rate mamuk; maibé anju sira revela katak Jesus Moris Hias tiha ona. Reflete, “Sé ita hadomi tebes, ita sei simu Naroman especial ba furak rohan laek no forsa husi Jesus Moris Hias nian iha ita nia moris”. 

Pe. Philip Heng, S.J.

Jesus moris hi’as

            1Iha loron uluk semana nian, iha rai hun mutin, sira ba to’o rate hodi lori mina morin nebe sira hadia. 2Sira hetan fatuk duir tiha ona housi rate. 3Tama tiha iha laran, sira la hetan Na’i Jesus nia isin. 4Sira sei hanoin hela, ema na’in rua ho unuk nabilan mosu ba sira. 5Tan feto sira tauk hodi hakru’uk ba rai, ema sira ne’e dehan ba sira: “Tansa imi buka ema moris iha mate sira le’et? 6Nia la iha ne’e; Nia moris hi’as ona! Imi hanoin fali wainhira Nia ko’alia ba imi wainhira Nia sei iha Galileia dehan: 7‘Ema sei saran Oan Mane ba ema maksalak sira liman nebe sei hedi Nia ba krus; no liu loron tolu Nia sei moris hi’as?.’” 8No sira hanoin fali Jesus nia liafuan sira.

            9Fila tiha housi rate, sira ba haktuir buat hirak ne’e hotu ba sira na’in sanulu resin ida no ba sira seluk hotu. 10Feto sira ne’e mak Maria Madalena, Joana ho Maria, Tiago nia inan, no mos sira seluk nebe la’o hamutuk ho sira. Sira haktuir ba apostolu sira buat hirak ne’e. 11Maibe sira rona nudar lia bulak, tan ne’e sira la fiar. 12Maibe Pedro hamriik hodi ba lalais rate. Hakru’uk tiha, nia hare hena sira de’it. Nia fila fali ba uma, hodi hakfodak ho buat nebe mosu tiha.