DGEMs

Maluk sira mak Kristu hadomi,

“Atitude sira iha ita-nia Fiar”: Jesus haklaken “aiknanoik bibi ne’ebé lakon” hodi revela katak Maromak nia domin mizerikórdiozu no haksolok liu tan; ba “klamar lakon” ida ne’ebé arrepende, do que bibi ne’ebé fiél. Reflete; “Ita mós sei la ‘haksolok’ liu; se ita-nia família ida arrepende; no fila fali ba moris ida ne’ebé sentradu iha Kristu, do que membru família sira seluk ne’ebé nakonu ho fiar?”

Bibi nebe lakon

1Publikanu no maksalak sira hotu hakbesik Jesus atu rona Nia. 2Fariseu no eskriba sira hamu’u dehan: “Ema ne’e simu maksalak sira hodi han hamutuk ho sira.” 3Tan ne’e, Nia haktuir ba sira aiknanoik ida ne’e: 4“Imi ida nebe mak, iha karik bibi atus ida no lakon tiha ida, la husik sia nulu resin sia seluk iha rai fuik maran, hodi ba buka ida nebe lakon to’o hetan nia? 5Hetan tiha, nia tau bibi ne’e ho ksolok iha nia kbaas. 6To’o tiha uma, nia bolu belun no maluk sira, hodi dehan ba sira: ‘Haksolok ho ha’u ba, basa ha’u hetan fali ona ha’u nia bibi nebe lakon.’ 7Ha’u dehan ba imi katak iha lalehan sei haksolok tamba ema maksalak ida nebe hakribi nia sala, liu fali ema diak sia nulu resin sia nebe la kuran atu hakribi sala.”