DGEMs

Maluk sira mak Kristu hadomi,

“Santu sira nia moris”: Ohin ita selebra “loron santu sira hotu” hodi fó honra ba sira ne'ebé moris iha sira nia fiar hanesan Kristu ho sasin ne’ebé ezemplár boot. Reflete; “Ita ida-idak ema sala-na’in, no mós santu sira-ne’e. Maibé, sira bele moris ho santidade.Ita hetan esperansa husi sira tamba Maromak nia domin ne’ebé la falha, rohan-laek; miserikórdiozu no kompasivu.”

Liafuan ksolok sira nian

  1Haré tiha ema lubun boot, Jesus sa'e ba foho ida. Wainhira Nia tur tiha, eskolante sira hakbesik ba Nia. 2Nia hahu hanorin sira hodi dehan: 3“Ksolok ba ema sira ne’ebé kiak iha laran, basa reinu lalehan sira nian. 4Ksolok ba sira ne’ebé tanis, basa sira sei hetan ksolok; 5ksolok ba sira ne’ebé laran kmaus, basa sira sei simu rai nudar liman rohan. 6Ksolok ba sira ne’ebé hamlaha no hamrook ba justisa, basa sira sei bosu. 7Ksolok ba sira ne’ebé laran luak, basa sira sei hetan laran luak. 8Ksolok ba sira ne’ebé laran mos, basa sira sei haré Maromak. 9Ksolok ba sira ne’ebé harii dame, basa ema sei hanaran sira Maromak oan. 10Ksolok ba sira ne’ebé ema fo terus tan buka justisa, basa reinu lalehan sira nian. 11Ksolok ba imi wainhira, tamba Ha'u, ema hateten aat imi, duni imi no bobar lia bosok hasouru imi. 12Imi  haksolok ba, foti neon ba, basa imi nia kolen boot liu iha lalehan; basa nune'e mos mak sira duni profeta sira ne’ebé mai uluk liu imi.”