DGEMs

Maluk sira mak Kristu Hadomi,

“Moris Komunidade – Jesus nia Dalan”: Jesus husu ita atu ho koko esforso diak sira hotu ne’ebé ita bele, atu bele manán fali ema ida iha komunidade ne'ebé la'o sala dalan. Ema ida-idak, maski halo sala boot oinsá ba mos; ema ne’e mak mos Maromak nia oan ne'ebé iha folin boot. Reflete; “Ema ida-idak Maromak kria atu moris ba nafatin ho Maromak iha lalehan.Ne'e duni, presiza nafatin motiva nia ho fuan perdaun nian; laran maus haraik-an nian, hanesan Jesus hatudu ona mai ita.”

15Jesus dehan ba nia disiplu sira: “O nia maun eh alin sala karik hasouru o, ba koalia ho nia mesa-mesak hodi hatudu nia sala. Nia rona karik o, o manan ona o nia maun eh alin ne’e. 16Nia la rona karik o, ba lori tan ema ida ka rua atu lia hotu sai los hodi sasin na’in rua ka tolu nia liafuan. 17Nia lakohi rona karik ema sira ne’e, ba fo hatene ba kreda. Maibé nia lakohi rona kreda karik, hare ona nia nudar ema gentiu no ema publikanu ida. 18Tebes, Ha’u dehan ba imi: Buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha lalehan.” 19 ‘Ha’u dehan tan ba imi: “Imi na’in rua iha rai ne’e lia tuir malu karik atu husu buat ida, Ha’u Aman iha lalehan sei fo duni ba imi. 20Basa iha fatin nebe ema na’in rua ka tolu halibur hamutuk hodi Ha’u nia naran, Ha’u mos iha sira nia le’et.”