DGEMs

Maluk sira mak Kristu hadomi,

“Espírito Santo revela ita nia salan sira”: Jesus haklaken ba Ninia eskolante sira, “Wainhira Tulun-Na’in mai, Nia sei hatudu mundu salan; no rejeisaun atu fiar iha Ha’u.” Reflete: “Kada ema iha Espírito Santo iha ninia fuan, atu inspira, guia no hakbiit nia atu moris-tuir Maromak ninia Lialos Salvasaun. Salan, mak rejeisaun hasoru Espírito Lialos.”

Iha tempu neba, Jesus dehan ba eskolante sira, “Oras ne’e ha’u ba iha Ida ne’ebé haruka Ha’u mai, no imi ida la husu Ha’u: ‘Ita ba ne’ebé?’ Maibé, tan Ha’u dehan buat hirak ne’e ba imi mak imi neon sala. Maibé Ha’u dehan lialos ba imi: di’ak liu ba imi katak Ha’u ba, basá Ha’u la ba karik, Ksolok Na’in sei la mai iha imi; maibé Ha’u ba karik, Ha’u sei haruka Nia ba imi. 

No wainhira Nia mai, Nia sei hatudu ba mundu kona-ba sala, kona-ba moris los no kona-ba tesi lia. Kona-ba sala, tan sira la fiar Ha’u; Kona-ba moris los, basá Ha’u ba Ha’u Aman no imi sei la haré Ha’u ona; kona-ba tesi lia, tamba sei tesi lia ona hasouru ukun na’in mundu ne’e nian.”