DGEMs

Maluk sira mak Kristu Hadomi,

“Kristu Moris-hias!” - Fiar: Maria la hatene Jesus, Na’i Moris-hias. Maria triste tebes tanba Jesus ninia isinlaiha rate; no iha posibilidade ema naok. Maibé, wainhira Jesus bolu nia “Maria,” nia rekonese kedas Jesus. Reflete: “Ita-nia Na’i Moris-hias ninia relasaun ho ita mak sempre pessoal. Koko atu senti Jesus ninia prezensa atentivu liu.”

Maria fali hamriik besik rate iha liur hodi tanis. Nia sei tanis hela, nia hakru’uk hodi hateke ba rate laran. Nia hare anju na’in rua hatais mutin tur iha fatin ne’ebé sira tau Jesus nia isin, ida iha ulun, ida iha ain. Sira dehan: “Feto, tansa o tanis?” Nia hatan ba sira: “Basá ema lori tiha ha’u nia Na’i no ha’u la hatene sira tau Nia iha ne’ebé.” 

Dehan tiha liafuan hirak ne’e, nia fila ba kotuk hodi hare Jesus hamriik iha neba, maibé nia la hatene katak ne’e Jesus. Jesus dehan ba nia, “Feto, tansa o tanis? O buka se?” Hanoin katak Nia mak to’os na’in, Maria husu fali: “Na’i, ita lori Nia karik, hateten to’ok mai ha’u ita tau Nia iha ne’ebé atu ha’u bele ba lori Nia.” 

Jesus dehan: “Maria!” Nia fila hodi dehan ba Jesus iha lia ema Hebreu nian: “Rabboni!” katak Mestre. Ne’e duni, Maria Madalena ba hateten ba eskolante sira: “Ha’u hare ona Na’i;” no nia hateten ba sira katak Nia dehan buat sira ne’e ba nia.