DGEMs

Maluk sira mak Kristu Hadomi,

“Lázarus – Moris hias” - Fiar: Evanjelu ohin-loron nian aprezenta katak Jesus hadomi Lázarus. Marta rasik hatene Jesus no fiar metin katak nia alin Lázarus sei la mate, wainhira Jesus iha ne’ebá. Maski nune’e,Nia sei bele hamoris nia. Reflete; “Ita iha fiar kle’an no domin ba Jesus, hanesan Marta, Maria no Lázarus ka lae?”

Nia feto sira haruka fó hatene ba Jesus: “Na’i, ida ne’ebé Ita hadomi moras.” Rona tiha ne’e, Jesus dehan: “Moras ne’e la’os atu mate, maibé atu fó Glória ba Maromak, atu housi nia, ema fó Glória ba Maromak Oan Mane.” Jesus hadomi Marta, nia alin feto no Lazaro. Maibé , rona tiha katak Lazaro moras, Nia hela loron rua tan iha neba. Liu tiha ne’e, Nia dehan ba eskolante sira: “Ita ba fali Judeia.” 

To’o tiha neba, Jesus hetan nia belun ema hakoi liu tiha loron haat. Rona katak Jesus to’o dau-daun, Marta sai ba hasouru Nia. Maria fali tur de’it iha uma. Marta dehan ba Jesus: “Na’i, Ita iha ne’e karik, ha’u nia maun la mate! Maibé oras ne’e mos ha’u hatene katak Maromak sei haraik ba Ita buat ne’ebé Ita husu ba Nia.”

Jesus hatan ba nia: “O nia maun sei moris hi’as.” Marta simu: “Ha’u hatene katak nia sei moris hi’as iha loron ikus.” Jesus dehan teni ba nia: “Ha’u ne’e moris hi’as no moris. Ema ne’ebé fiar Ha’u, maski mate ona, nia sei moris. Ema hotu ne’ebé moris hodi fiar iha Ha’u, nia sei la mate tan ba nafatin. O fiar ne’e?”