DGEMs

Maluk sira mak Kristu Hadomi,

“Salvasaun Rohan Laek” - Fiar: Jesus fo-sai ba Judeu sira, “Ema ne’ebé rona Ha’u-nia Liafuan, no fiar ba Ida ne’ebé haruka Ha’u (Aman Maromak), nia hetan moris rohan laek.” Reflete; “Atu fiar ba Jesus ho laran kle’an liu tan, ita tenke moris tuir Evanjelu ne’ebé Nia hanorin; halo-tuir Doutrina Igreja ne’ebé Nia hari’i ho apostolu sira; no simu Sakramentusira ne’ebé Nia halo.”

Jesus liatun ba Judeu sira: “Tebes, tebes, Ha’u dehan ba imi katak ema ne’ebé rona Ha’u nia liafuan hodi fiar Ida ne’ebé haruka Ha’u mai, nia hetan moris rohan laek: sei la tesi lia todan hasouru nia: nia liu ona housi mate ba moris. Tebes, tebes, Ha’u dehan ba imi katak oras besik ona, lo-los to’o ona mai, wainhira ema mate sira sei rona Maromak Oan nia lia, no sira hotu ne’ebé rona sei moris. Nudar Aman moris na’in, nune’e mos Nia halo Oan sai moris na’in, hodi haraik ba Nia kbiit atu tesi lia, basa Nia mak Oan Mane. 

Imi keta hakfodak ho buat ne’e, basa oras to’o dau-daun wainhira sira hotu ne’ebé iha rate laran sei rona Nia lia, no sira ne’ebé halo diak, sei sa’e ba moris hi’as moris nian: sira ne’ebé halo aat sei moris hi’as ba kastigo. Ha’u mesak la bele halo buat ida housi Ha’u An rasik. Ha’u tesi lia tuir buat ne’ebé Ha’u rona. Ha’u nia lia tesi los, basa Ha’u la buka Ha’u nia hakarak, maibé Ida ne’ebé haruka Ha’u nia hakarak.