DGEMs

Maluk sira mak Kristu hadomi,

“Jesus nia autoridade Divina”: iha Evangelho ohin, Jesus haklaken kona-bá Evangelho salvasaun nian ho autoridade no sabedoria divina. Jesus fó testemunho ba Lialos Divinu hodi duni sai diabu sira ne’ebé mak ukun hela ema balun. Reflete; iha mundu sekular, ema barak mak halo esforsu oi-oin hodi halo ema seluk gava, maibé sira senti “mamuk” iha sentidu moris. Wainhira ita nia moris nakonu ho buat “mamuk” – ita labele lori ema besik liu tan ba Maromak ne’ebé oferese moris rohan laek ba ita.

21Wainhira loron Sabadu to'o, Nia tama iha sinagoga hodi hanorin. 22Ema sira hakfodak ho Nia hanorin, basa Nia hanorin hanesan ema ne’ebé iha kbiit, la'os hanesan eskriba sira. 23Teki-teki, mane ida ho diabu iha nia laran mosu iha sinagoga hodi hakilar dehan: 24“Iha buat sa iha ami no O nia le’et, Jesus Nazare? O mai atu halakon ami? Ha’u hatene O se los: O Maromak nia  santu!” 25Maibé Jesus lia tun ba nia hodi dehan: “Nonok no sai housi nia!” 26Espiritu foer ne’e doko maka'as ema ne'e hodi hakilar, hafoin sai housi nia. 27Ema sira hakfodak teb-tebes. Nune'e, sira husu ba malu dehan: “Sa mak ne'e? Hanorin foun ida ho kbiit! Nia haruka espiritu foer sira no sira halo tuir Nia.”