Segunda-Feira depois de Epifania: Loron 5, Fulan Janeiro, 2026, January 5, 2026

Reflection on the WORD

Maluk sira mak Kristu hadomi,

“Jesus nia misaun Pastoral”: Depois de rona katak ema kaer ona João Batista, Jesus fila ba Galileia no hahu ninia misaun pastoral. Jesus haklaken Liafuan diak Salvasaun nian. Jesus kura mós sira ne’ebé moras, aleizadu – la’o labele, no sira ne’ebé diabo ukun hela sira nia laran. Reflete; Se ita nia fiar iha Kristu ne’e kle’an, ita mós bele experimenta ninia fuan kompasivu no mizerikórdioso. 

Mt 4:12-17,23-24

Jesus hanorin iha Galileia

12Rona tiha katak ema dadur ona João, Jesus fila ba Galileia. 13Husik tiha Nazare, Nia ba Kafarnaum, sidade besik tasi ibun, rai Zabulon ho Neftali nian, 14atu sai tuir buat nebe profeta Isaias fo sai tiha ona: 15“Rai Zabulon, rai Neftali, dalan tasi nian, Jordaun nia sorin ba, Galileia gentiu sira nian; 16povu nebe horik dau-daun iha nakukun laran hare tiha roman boot ida; naroman mosu ona ba sira nebe hela dau-daun iha nakukun mate nian.” 17Houri oras ne'e, Jesus hahu hanorin hodi dehan: “Imi hakribi imi sala ba, basa reinu lalehan nian besik dau-daun ona.”

 

Haklaken evangeliu no fo isin diak

23Hafoin Nia hahu la'o lemo Galileia tomak hodi hanorin iha sira nia sinagoga sira, haklaken liafuan diak reinu nian no fo isin diak ba moras sira iha povu nia le’et. 24Nia naran boot iha rai Siria tomak. Sira lori ba Nia ema sira hotu nebe terus housi moras no susar oi-oin, sira nebe diabu tama iha laran, sira nebe moras bibi mate no sira nebe isin mate; Nia fo isin diak ba sira.

Today's Pointers on God's Word

As you read the passage what words, phases or meanings caught your attention?

  • Jesus senti triste lós wainhira rona katak ema kaer ona João Batista hodi tau nia iha prizaun. Jesus hatene katak, nudar ser humanu, ita mós senti vulneravel ho inserteza sira ne’ebé akontese iha ita nia moris. 
  • Ita nia kanek, susar no dezafiu sira mak hanesan “nakukun” iha ita nia moris ne’ebé dalaruma halo ita lakon esperansa no fiar iha Maromak. Jesus mak Naroman ne’ebé sei ilumina ita nia nakukun sira hodi restaura fali ita nia esperansa ba Maromak iha ita nia moris. 
  • Hanesan ema fiar na’in, ne’ebé dalaruma enfrenta nakukun no pekadu iha moris, ita presiza buka nafatin Naroman no kaer metin iha Roman Kristu nian ne’ebé halo ita laran metin hodi moris nakonu ho esperansa.