DGEMs

Maluk sira mak Kristu hadomi,

“Lialos Divinu iha Kristu”: Iha Evangelho ohin, Judeu sira buka atu oho Jesus. Maibé, ho korazen no kompromissu forte, Jesus haklaken iha Templu Jerusalem, katak Nia mak loloos Messias. Reflete: “Ita iha korazen atu sai sasin ba Jesus nu’udar ita-nia Messias; ka ita tauk atu testamunha Jesus ninia Lialos, wainhira ita hasoru dezafiu?”

Jesus la’o iha Galileia; Nia lakohi la’o iha Judeia, basa Judeu sira buka atu oho Nia. Festa Tabernakulu Judeu sira nian besik dau-daun ona. Maibé wainhira Nia maun alin ba tiha ona festa, Nia mos ba la hodi la’o iha ema hotu nia oin, maibé sub-subar de’it. Iha Jerusalem ema balun hateten: “La’os ida ne’e mak ema buka atu oho? Maibé Nia koalia iha ema hotu nia oin, no sira la dehan buat ida ba Nia. Keta na’i ulun sira hatene ona lo-los katak Nia mak Kristu karik?

Tuir mai, wainhira Nia hanorin iha templu, Jesus dehan ho lia maka’as: “Imi hatene Ha’u, imi hatene mos Ha’u mai housi ne’ebé. Maibé Ha’u la mai hodi Ha’u an rasik, maibé Ida ne’ebé haruka Ha’u mai, Nia los; no imi la hatene Nia; Ha’u hatene Nia basa Ha’u mai housi Nia no Nia mak haruka Ha’u mai.” Sira buka kaer Nia, maibé ema ida la tau liman ba Nia, basa nia oras seidauk to’o.