DGEMs

Maluk sira mak Kristu hadomi,

“Halo Santu iha Lialos” – Fiar: Iha Evangelho ohin, Jesus harohan, “Aman, halo eskolante sira santu iha Lialos; Ita-nia Liafuan mak Lialos. Ha’u haruka ona sira ba mundu.” Reflete: Jesus harohan makaas husu Ninia Aman ninia protesaun mai ita; hadook ita husi mundu ninia odiu ne’ebé hakarak harahun ita-nia fiar no Ninia Igreja. Ita presiza harohan no simu Sakramentu sira bebeik no fervermente.”

Pe. Philip Heng, S.J.

Jesus foti matan ba lalehan dehan: ‘Aman Santu, tau matan ba sira iha Ita naran ne’ebé Ita haraik mai Ha’u, atu sira sai ida de’it nu’udar Ita ho Ha’u ida de’it. Wainhira Ha’u sei hela ho sira, Ha’u rasik tau matan ba sira iha Ita naran ne’ebé Ita fó mai Ha’u. Ha’u tau matan didiak ba sira, atu sira ida mós la lakon; lakon de’it mak lakon an aat nia oan, atu Eskritura sai tuir lolos. Maibé oras ne’e Ha’u atu fila ba Ita, no Ha’u dehan sai buat hirak ne’e iha mundu atu sira hetan Ha’u-nia ksolok to’o sai lolos.’

‘Ha’u fó hatene ona ba sira Ita-nia liafuan, no mundu odi sira, basá sira la’os mundu ne’e nian, nu’udar Ha’u mós la’os mundu ne’e nian. Ha’u la husu atu Ita hasai sira husi mundu, maibé atu Ita hadook sira husi Aat Na’in. Sira la’os mundu ne’e nian nu’udar Ha’u mós la’os mundu ne’e nian. Halo sira santu iha lialos. Ita-nia liafuan mak lialos.’

‘Nu’udar Ita haruka Ha’u mai iha mundu, nune’e mós Ha’u haruka sira ba mundu. No tamba sira mak Ha’u halo An santu, atu sira mós bele sai santu iha lialos.’