DGEMs

Maluk sira mak Kristu hadomi,

“Paixaun Jesus nian hahu”—Fiar: Celebrasaun liturjikal ohin nian, ita hahu atu prepara atu hamoris fila fali eventu sira paixaun Jesus nian. Feto arependida ida ne’ebé tau mina ba Jesus nia ain, Judas ne’ebé bobar lia hasoru Jesus, no Jesus nia discípulu sira hahu preparasaun ba han kalan ikus nian. Reflete; oinsa atu halo orasaun hodi husu grasa especial sira atu sai konsiente liutan kona-bá ita nia sala sira ne’ebé kontribui ba Jesus nia sofrimentu sira.”

Pe. Philip Heng, S.J.

Amlulik boot buka atu oho Jesus

            1Sei hela loron rua tan molok festa Paskua no Paun Fermentu Laek nian. Amlulik boot sira no eskriba sira buka namanas atu lohi hodi kaer no oho Nia. 2Sira dehan: "Keta iha festa laran, atu la povu rungu-ranga."

Jesus iha Betania

            3Jesus hela iha Betania, iha Simao ne’ebé moras lepra nia uma. Nia tur hela iha meja, feto ida lori mai botil alabastru ida nakonu ho mina morin nardu lolos nian, ne’ebé fólin boot tebes. Nia fera botil ne'e hodi fui mina morin ba Jesus nia ulun.4Ema balun hirus hodi dehan  ba malu, "Tan sa halo aat le’et mina morin ne'e? 5Bele fa'an nardo ne’e ba fólin denariu atus tolu resin hodi fó ba ema kiak sira." Sira hateten aat feto ne'e. 6Maibé Jesus dehan: "Husik nia ba! Tan sa imi halo terus nia? Nia halo buat diak ida mai Ha’u. 7Imi sei hetan nafatin ema kiak sira, no wainhira imi hakarak, imi bele halo diak ba sira. Maibé Ha’u, imi sei la hetan bei-beik. 8Nia halo buat ne’ebé nia bele. Nia tau nanis mina morin ba Ha’u isin atu hadia nia ba rate. 9Ha’u dehan los ba imi: iha fatin naran de’it ne’ebé ema sei haklaken liafóun diak iha mundu tomak, sira sei haktuir buat ne’ebé nia halo ne'e hodi hanoin nia."

Judas hakotu lia atu saran Jesus

            10Sira sanulu resin rua ne'e ida, naran Judas Iscariotes, ba amlulik boot sira atu saran Jesus ba sira. 11Rona tiha nia, sira haksolok hodi hakotu lia atu fó osan ba nia. Nia buka namanas tempu diak ida atu saran Nia.

Jesus halo han hemu Paskua nian ho Nia eskolante sira

            12Iha loron uluk Paun Fermentu Laek nian, wainhira sira hasa'e buat karan Paskua nian, eskolante sira husu ba Jesus, “Ita hakarak katak ami hadia han hemu Paskua nian iha los ne’ebé?” 13Nia haruka eskolante na’in rua hodi dehan ba sira, “Ba sidade laran. Mane ida ne’ebé lori be iha buli ida sei la'o hasouru imi. 14‘Mestre husu: fatin ne’ebé Ha’u atu halo han hemu Paskua nian hamutuk ho Ha’u nia eskolante sira iha los ne’ebé?’ 15Nia sei hatudu fatin luan ida iha andar leten ne’ebé nahe no halo furak ona. Hadia sasan sira iha neba.”