DGEMs

Maluk sira mak Kristu hadomi,

“Obedece ba Maromak ninia Hakaran – Fiar: Iha Evangelho ohin, Simão Pedro obedece ba Jesus maske nia riku iha esperiensia kail ikan, no la konsege kaer ikan iha kalan liu ba. Reflete: “Ita halo-tuir Maromak wainhira Nia husu husi ita mak ida ne’ebé ita hakarak halo? Ita-nia obediensia ba Maromak ninia hakaran, altruista, no sein kondisaun, hanesan Pedro, ka ita espera Maromak atu konkorda ho ita-nia hakaran no maneira sira?”

Pe. Philip Heng, S.J.

Koalia hotu tiha, Nia dehan ba Simão: “Tama liu ba tasi laran no soe dai ba!” Simão hatan, “Mestre, ami serbisu tiha kalan tomak, la kaer buat ida. Maibé, tan Ita mak dehan, ha’u sei soe duni dai.” Wainhira sira halo nune’e, sira kaer ikan barak teb-tebes, dai besik atu nakles. Sira leok liman hodi bolu maluk sira iha ro seluk atu mai tulun sira. Sira mai duni, hodi halo ro rua nakonu didiak besik atu mout.

Hare tiha ne’e, Simão Pedro monu ain ba Jesus, hodi dehan: “Na’i, hadook An housi ha’u, tan ha’u ema maksalak ida!” Tebes duni, nia ho nia maluk sira seluk hakfodak tamba ikan barak ne’ebé sira kaer. Simão nia maluk sira, katak João no Tiago, Zebedeu nia oan sira, sira mós hakfodak. Jesus dehan Simão: “Keta tauk; houri ohin ba oin o sei kaer ema.” Dada tiha ro ba tasi ibun, sira husik buat hotu hodi la’o tuir Jesus.