14ª Semana Tempu Komun: Segunda-feira, loron 10, fulan Jullu, 2023 July 10, 2023
Reflection on the WORD
Maluk sira mak Kristu hadomi,
Fiar iha Jesus: Iha Evangelho ohin, ema lubun boot sira hamnasa Jesus wainhira Nia ba halo moris hikas na’i ulun ida nia oan feto ne’ebé mate tiha ona. Reflete; iha mundu sekular ohin loron, ema barak mak hamnasa Jesus nu’udar Mesias liu-hosi sira nia maneiras aat sira: ataka destrutivu ba fiar no Igreja; imoralidade, injustisa no korupsaun. Oinsá ita sai sasin ba ita nia fiar lor-loron?
Pe. Philip Heng, S.J.
Mt 9:18-19,23-26
Feto moras ran suli sai. Jairo nia oan feto.
18Wainhira Jesus koalia dau-daun ba sira, nai ulun ida hakbesik ba Nia hodi monu ain iha nia oin dehan: “Ha’u nia oan feto foin mate; maibe Ita boot hiit An mai tau liman ba nia, nia sei moris.” 19Jesus hamriik hodi la’o tuir nia hamutuk ho eskolante sira. 23Wainhira Nia to’o ba na’i ulun nia uma hodi hare ema hu’u flauta no ema barak seluk book an ba book an mai, Nia dehan; 24“Imi sai tiha, labarik la mate; nia toba deit.” Sira hamnasa Nia. 25Wainhira ema lubun sai ona, Nia tama ba laran, kaer labarik feto nia liman, no labarik feto ne’e hamriik. 26Liafuan kona ba buat ne’e naklekar iha rai tomak neba.
Today's Pointers on God's Word
As you read the passage what words, phases or meanings caught your attention?
- · Na’i ulun nia fiar iha Jesus maka’as tebes katak Jesus bele halo moris nia oan feto sekarik Jesus tula nia liman ba na’i ulun nia oan feto.
- · Wainhira ita iha susar laran, ita fiar maka’as ba Jesus ka la’e? Ita limita ita nia-an ba buat ne’ebé ita fiar katak Jesus bele tulun ita iha susar nia laran?
- · Ita nia fiar kle’an depende ba ita nia domin no fiar iha Jesus nu’udar ita Nia Na’i iha ita nia moris. Reza ba atu ita nia fiar sai profunda no lori ba relasaun pesoal ho Na’i Jesus.