DGEMs

Maluk sira mak Kristu hadomi,

Domin protetor Maromak Nian: Iha evangelho ohin, anju mosu ba José iha mehi hodi dehan ba nia atu halai ba Ejiptu basá liurai Herodes sei buka kosok oan Jesus atu oho. Reflete; domin protetor Maromak Nian nunka failha ita, wainhira ita moris fuan ho neon tomak iha Na’i Nia domin, Nia hakarak no Nia hanorin sira. Maibe ita iha buat barak atu ta’uk no lakon wainhira Maromak la sai sentru iha ita nia moris.

Pe. Philip Heng, S.J.

3Rona tiha liafuan hirak ne'e, liurai Herodes hamutuk ho sidade tomak laran taridu teb-tebes. 4Nia halibur amlulik boot sira no eskriba sira povu nian hodi husu ba sira Kristu sei moris los iha nebe. 5Sira hatan ba nia: “Iha Belem, iha rai Judeia, basa hakerek nanis ona housi profeta: 6‘Belem, rai Juda, iha sidade boot sira Juda nian, la'os o mak kiik liu; basa housi o mak sei mosu Na’i Ulun ida nebe sei tau matan Ha'u nia povu Israel.’”

            7Tuir mai Herodes haruka bolu sub-subar deit ema matenek sira; nia husu di-diak ba sira sa tempu fitun ne'e mosu ba sira. 8Hafoin nia haruka sira ba Belem dehan: “Imi ba to'ok. Imi sei husu tuir di-diak kona ba Kiik Oan ne'e. Hafoin, hetan tiha nia, imi mai fo hatene ha'u atu ha'u mos bele ba tuku tur adora Nia.”  9Rona tiha liurai, sira la'o ona. Fitun nebe sira hare iha lorosa’e la'o uluk sira oin, to'o fatin nebe Kiik Oan hela ba. 10Hare tiha fitun, sira laran haksolok teb-tebes. 11Tama tiha uma laran, sira hare Kiik Oan ho Nia inan Maria. Sira tuku tur ba rai hodi adora Nia. Loke tiha sira nia rikusoi, sira hasa’e ba Nia sira nia buat ksolok; osan mean, aiben morin no naan horun. 12Tan simu lia menon housi mehi katak sira la bele fila hikas ba Herodes, sira fila ba sira rai housi dalan seluk.

Halai ba Egiptu

13Sira ba tiha, Na’i nia anju ida mosu ba Jose iha mehi hodi dehan: “Hamriik ba, lori Kiik Oan ho nia inan, halai ba Egiptu hodi hela iha neba to’o ha’u fo hatene ba o, basa Herodes sei buka Kiik Oan ne'e atu oho.” 14Nia hader iha kalan, lori Kiik Oan ho nia inan, halai ba Egiptu 15hodi hela iha neba to'o Herodes mate. Nune'e sei sai tuir duni buat nebe Na’i fo sai housi profeta: “Ha'u bolu Ha'u nia Oan housi Egiptu.”

Fila housi Egiptu

19Herodes mate tiha, Na’i nia  anju ida mosu ba Jose iha Egiptu iha mehi hodi dehan: “Hader tiha, lori fali Kiik Oan ho nia inan ba rai Israel, basa sira nebe buka Kiik Oan ne’e nia moris mate tiha ona.” 21Jose hader mai, lori Kiik Oan ho nia inan fila fali ba rai Israel. 22Maibe, rona tiha katak Arquelau mak ukun iha Judeia iha nia aman nia fatin, Jose tauk atu ba neba. Tuir mehi ida haruka, nia ba rai Galileia, 23hodi hela iha sidade ida naran Nazare; nune’e sai tuir duni buat nebe profeta sira dehan; “Ema sei hanaran Nia Nazare Oan.”