DGEMs

Maluk sira mak Kristu hadomi,

“Personal Jesus Ressucitado”- fiar: Iha Evangelho loron ohin, wainhira Jesus Ressucitado bolu Maria nia naran, nia imediatamente rekonhese Jesus, no Maria nakonu ho ksolok. Reflete, “Jesus toka ita nia fuan ho maneira personal sira. Nune’e, kontinua atenta ho Jesus no haklean ita nia relasaun pessoal ho Nia.”

Pe. Philip Heng, S.J. 

Jesus mosu ba Maria Madalena

                    11Maria fali hamriik besik rate iha liur hodi tanis. Nia sei tanis hela, nia hakru’uk hodi hateke ba rate laran. 12Nia hare anju na’in rua hatais mutin tur iha fatin nebe sira tau Jesus nia isin, ida iha ulun, ida iha ain. 13Sira dehan: “Feto, tansa o tanis?” Nia hatan ba sira: “Basa ema lori tiha ha’u nia Na’i no ha’u la hatene sira tau Nia iha nebe.” 14Dehan tiha liafuan hirak ne’e, nia fila ba kotuk hodi hare Jesus hamriik iha neba, maibe nia la hatene katak ne’e Jesus. 15Jesus dehan ba nia, “Feto, tansa o tanis? O buka se?” Hanoin katak Nia mak to’os na’in, Maria husu fali: “Na’i, ita lori Nia karik, hateten to’ok mai ha’u ita tau Nia iha nebe atu ha’u bele ba lori Nia.” 16Jesus dehan: “Maria!” Nia fila hodi dehan ba Jesus iha lia ema Ebreu nian: “Rabboni!” katak Mestre. 17Jesus dehan ba nia: “Keta kona netik Ha’u, tan Ha’u seidauk sa’e ba Aman. Maibe ba hasouru Ha’u nia maun alin sira hodi dehan ba sira: Ha’u sa’e ba Ha’u nia Aman no imi nia Aman; ba Ha’u nia Maromak no imi nia Maromak.”