DGEMs

Maluk sira mak Kristu hadomi,

Julgamento no krucifikasaun Jesus nian: Iha Evangelho loron ohin, Jesus hetan julga, kondena no krucifika husi judeu sira nebé mak plano tiha ona atu oho Nia. Reflete, “Jesus nia sakrifisiu domin mak hatudu momós nia Paixaun no Mate, katak Jesus determina ona atu soi humanidade ho folin saida de’it. Bót oinsá Ita nia domin ba Jesus lor-loron? “

Pe. Philip Heng, S.J. 

Jesus iha Pilatos nia oin

            1Ema lubun tomak hamriik hodi lori Nia ba Pilatos. 3Pilatos husu, “O Judeu sira nia liurai?” Nia hatan ba nia, “O mak dehan.” 4Pilatos dehan fali ba amlulik boot sira no ba ema lubun boot: “Ha’u la hetan sala ida iha ema ne’e.” 15Herodes mos la hetan buat ida; tan ne’e, nia haruka fali mai ha’u. Ema ne’e la halo buat ida nebe soi mate. 16Ne’e duni, ha’u sei kastigu Nia hodi husik Nia ba.”

            (17Nia ten ke husik ema ida ba sira iha loron festa.) 18Maibe sira hotu hakilar hamutuk dehan: “Oho tiha nia! Hasai mak Barrabas!” 20Dala ida tan Pilatos ko’alia ba sira hodi buka soi Jesus.  21Maibe sira hakilar nafatin:  “Hedi Nia ba krus! Hedi Nia ba krus!” 22Ba dala tolu nia dehan ba sira: “Nia halo aat sa?  Ha’u la hetan sala ida nebe soi mate. Ne’e duni, ha’u sei kastigu Nia, hafoin husik Nia ba.” 24Ne’e duni, Pilatos haraik buat nebe sira husu; 25nia hasai ema nebe dadur tan soran povu no oho ema, no saran Jesus ba sira tuir sira nia hakarak. 26Wainhira sira lori Nia, sira kaer ema ida housi Sirene naran Simao, nebe fila dau-daun housi to’os, hodi tau krus iha nia kbaas atu lori tuir Jesus. 27Ema lubun boot tuir Nia, no mos feto sira nebe baku sira nia hirus matan no tanis hanoin tebes Nia. 28Maibe Jesus fila oin ba sira dehan: “Jerusalem nia oan feto sira, keta tanis tamba Ha’u; maibe tanis tan imi an rasik no tan imi nia oan sira. 33Wainhira sira to’o fatin naran Kalvariu, sira hedi Nia ba krus ho ema aat sira ne’e, ida iha sorin kuana, ida seluk iha sorin karuk. 34Jesus dehan: “Aman, perdua sira, basa sira la hatene buat nebe sira halo.” Tuir mai sira dada  sorte atu fahe ba malu Jesus nia unuk sira.  38Iha nia ulun leten ema hakerek: “Ne’e mak Judeu sira nia liurai.” 44Besik ona loron fahe rua, nakukun taka rai tomak to’o tuku tolu loraik, loromatan lakon nia naroman. 45Hena templu nian nakles fahe ba rua iha klaran, 46no Jesus hakilar ho lia maka’as: “Aman, iha Ita liman Ha’u saran Ha’u nia klamar!” Dehan tiha ne’e, Nia iis kotu.