DGEMs

Maluk sira mak Kristu hadomi,

Maria nia Fiar: iha Evangelho ohin, Maria nia fiar revela Maromak nia domin. Maria prontu atu simu maski hatene risku katak - ema bele tuda mate nia - se Maromak hakarak.  Reflete: ita nia domin ba ema seluk ne’e hatudu dunik ita nia fiar ba Maromak ka la’e? Sakrifísiu saida mak ita halo no ita partilha bensaun Maromak nian ho ema seluk ka la’e?"

Pe. Philip Heng, S.J.

Iha fulan neen, Maromak haruka anju Gabriel ba knua ida Galileia nian, naran Nazare, ba fetoran ida ne’ebé hakotu tiha ona ba mane ida naran Jose, housi David nia umakain; fetoran ne’e naran Maria. Tama tiha iha uma, anju dehan: “Rahun diak, feto kmanek wa’in tebes! Na’i ho ita!”

Rona tiha lia ne’e, nia laran taridu hodi husu ba nia an rasik kumprimentu ne’e katak sa los. Anju dehan ba nia: “Keta tauk, Maria; basa o hetan rahun diak tebes iha Maromak futar oin. O sei ko’us no tur ahi oan mane ida. O sei hanaran Nia Jesus. Nia sei sai ema boot; ema sei hanaran Nia Na’i aas liu hotu nia Oan. Na’i Maromak sei haraik ba Nia nia aman David nia kadunan. Nia sei ukun Jacob nia umakain ba nafatin; nia ukun sei rohan laek.”

Maria husu ba anju: “Ne’e sei sai oin sa los, basa ha’u la hola mane?”

Anju hatan ba nia dehan: “Espiritu Santu sei tun ba o no Na’i aas liu hotu nia kbiit sei hamahan o. Tan ne’e santu ne’ebé atu moris sei hanaran An ‘Maromak nia Oan.’ O nia feto maluk Isabel mos ko’us tiha oan mane ida, maski ferik ona. Ida ne’ebé ema dehan la ko’us, nia ko’us fulan neen ona; basa, ba Maromak, la iha buat ida ne’ebé la bele.”

Maria dehan: “Ne’e sa, Na’i nia atan oan mak ne’e. Halo tuir ita liafuan ba!” Hafoin anju husik nia.